વરસાદ પછીનો ઉઘાડ

“શબ્દે-શબ્દે પાંગરેલો અને પાને-પાને નવા ઉઘાડ સર્જતો ગઝલકાર ગૌરાંગ ઠાકર

Posted on: સપ્ટેમ્બર 18, 2010

-જિગર જોષી ‘પ્રેમ’
[વ્હાલ વાવી જોઇએ : લે. ગૌરાંગ ઠાકર, પ્રકાશક: સાહિત્ય સંગમ, પ્રથમ આવૃત્તિ – 2૦10, મૂલ્ય રૂ. 6૦/-]

ગઝલને અને સુરત પ્રદેશને પહેલેથી જ ઘરોબો રહ્યો છે. કંઇ કેટલાયે શબ્દ-સાધકો એ પ્રદેશમાંથી આવ્યા અને સુરતની “સૂરત”ને વધુ પ્રભાવક્તા બક્ષી, વધુ ઉજ્જવળ બનાવવા સુયત્નો કીધાં અને એમાં ભારોભાર પાર પણ ઉતર્યા. એટલે એવા ઉચ્ચ-ઘરાનામાંથી આવતા, “એ પરંપરા”માંથી આવતા કોઇ નવા વારસદાર પાસેથી સાહિત્યજગતને અદકેરી અપેક્ષા હોય એ સ્વાભાવિક છે. આવી અપેક્ષામાં સક્ષમરીતે પાર ઉતરેલા ગઝલકાર એટલે શ્રી ગૌરાંગ ઠાકર. “વ્હાલ વાવી જોઇએ” એકરીતે “શબ્દ-પંચમ” છે. અને કે’વાય છે કે પંચ ત્યાં પરમેશ્વર. આ શબ્દ-પંચમમાં સૌપ્રથમ આ સંગ્રહને સત્કારતા પરમ વંદનીય પૂ. શ્રી મોરારિબાપુ એમ લખે છે કે “કવિતા તો સરિતા છે. એ બે કાંઠાની વચ્ચે પણ હોય અને પૂર આવે ત્યારે અતિક્રમે પણ. યુવા કવિઓમાં વિશ્વસામગ્રીમાંથી અબોટ વાતો પકડાતી જોઇને વિશેષ રાજી થાઉં છું.”

વિષય વૈવિધ્યની સાથોસાથ છંદો વૈવિધ્ય વિસ્તારવું એ કવિની પોતીકી આવડત છતી કરે છે. નવા રદીફો સાથે કામ પાર પાડવાની ખેવના, કાફિયાઓને નાવિન્યતાસભર વાતાવરણમાં મૂકવાનો રોમાંચ અને શે’રમાં નવા પ્રાણ પૂરવાની અથાગ મહેનત જ એક ઉત્તમ રચનાને જન્મ આપે છે. આ કવિ ઉક્ત વાતથી સુપેરે પરિચિત છે જ. અને એટલે “કામિલ” જેવા બહુ જૂજ કવિઓ દ્વારા ખેડાયેલા છંદમાં પણ આ કવિએ હાથ અજમાવ્યો છે અને શેરીયત સિધ્ધ કરી છે જુઓ:
હું તો માત્ર શ્વેત લકીર ને તમે સાત રંગનો સાથિયો, હું ભળી શકું બધાં રંગમાં, મને બેઉ હાથે મિલાવજો. પૃ.11

શબ્દ-પંચમમાં આગળ વધીએ તો કવિ શ્રી ગૌરાંગ વિશે ગુજરાતી સાહિત્ય પરિષદના વર્તમાન પ્રમુખ આદરણીય શ્રી ભગવતીકુમાર શર્મા એમ નોંધે છે કે“ગઝલના માધ્યમ પર તેમની પૂરી પકડ છે. ગઝલ સર્જન પરત્વે તેમની સભર નિષ્ઠા છે અને ગઝલપ્રકારની બધી વિશિષ્ઠતાઓને પૂરી સમજણથી નાણીને ગંભીરતાપૂર્વક તેઓ ગઝલ સર્જન કરતા રહ્યા છે.” સરળ ભાષા, સૂક્ષ્મ અને સક્ષમ વિચાર આયોજન, સુસ્પષ્ટ નિરિક્ષણ શક્તિ તથા અર્થપૂર્ણ નાવિન્ય” એ એમની સર્જનક્ષણોના કેન્દ્ર સ્થાને હોય એવું આ સંગ્રહમાંથી પસાર થતા મને અનેકોવાર લાગ્યું છે. જુઓ એનું એક ઉમદા ઉદાહરણ…

એક તો તારો મને પર્યાય દેખાતો નથી
ને ઉપરથી તું સરળતાથી અહીં મળતો નથી.

તું હવે વરસાદ રોકે તો હું સળગાવું ચૂલો,
રોટલો આ છત વગરના ઘરમાં શેકાતો નથી.
એક માણસ ક્યારનો આંસૂ લૂછે છે બાંયથી,
આપણાંથી તોય ત્યાં રૂમાલ દેવાતો નથી. પૃ. 03

શબ્દ-પંચમની એ કડીને ફરી આગળ જોડીએ તો “વ્હાલની વાવણી” કરતાં-કરતાં પ્રસ્તાવનામાં ડો. રશીદ મીર આ ગઝલકારને પોંખતા એમ લખે છે કે “ઇશ્વર પાસે શબ્દસાધક બનવાની આવી નોખી દીક્ષા માંગનાર ગૌરાંગ ઠાકરને ઇશ્વરે તથાસ્તુ કહી દીધું છે”

વરસાદ તું પણ આજ હવે મન મૂકીને પડ,
એક જણ જતું ‘તું ઘર, હવે રોકાઇ ગયું છે. પૃ. 17

“તથાસ્તુ” કહીને ઇશ્વરે આ કવિને તાકાત આપી દીધી છે શે’રમાં પ્રાણ પૂરવાની. પાને-પાને નવા ઉઘાડ લાવતો અને શબ્દે શબ્દે અદકેરું પાંગરતો આ કવિ મુશાયરાઓમાં પણ એટલો જ જામે છે. શબ્દ-પંચમનો ચોથો મહત્વનો પડાવ એટલે મુંબઇના યુવા કવિ શ્રી હીતેન આનંદપરા. મુંબઇની વિખ્યાત કલા સંસ્થા ઇન્ડિયન નેશનલ થિયેટર (આઇ.એન.ટી.) દ્વારા શયદા એવોર્ડ-2009ની જાહેરાત થઇ એ સંદર્ભને ધ્યાને લેતા કવિમિત્ર શ્રી હીતેન આનંદપરા આ પુસ્તકમાં લખે છે કે “ગઝલના વિશાળ ગામમાં પોતાનું પાકું ઘર બાંધવાનો અવસર મળે એ દરેક નવા ગઝલકારની ઇચ્છા હોય છે. આ ગઝલકારની એ ઇચ્છા ફળી એ આનંદની વાત છે.” પોતીકા અનુભવોના ચશ્મા વડે નવી રીતે દ્રશ્યો જોવાની પ્રેરણા આ કવિ પાસેથી લેવા જેવી ખરી.

તમે બારીમાં ઉભા રહિને કીધી છાંયડાની વાત,
અમે વાંસા ઉપર તડકો જુઓ ચોગાનમાં લીધો. પૃ. 47

અને શબ્દ-પંચમની અદકેરી કડી જોડતાં કેન્દ્રસ્થાને કવિ પોતે વ્હાલ વાવવાની વાત કરે છે. એટલે આમ શબ્દપંચમ રચાયું એ એક સુયોગ છે. “વ્હાલ વાવી જોઇએ” સાહિત્ય જગતના વર્તમાન પ્રવાહમાં નોખી મુદ્રા ઉપસાવનારો છે એમ કહેવું અતિ આવશ્યક થઈ પડે એટલી સક્ષમતાથી આ કવિએ કલમ ચલાવી છે. આ સંગ્રહને અઢળક વ્હાલ મળે એ જ અભ્યર્થના સાથે અસ્તુ.

Advertisements

8 Responses to "“શબ્દે-શબ્દે પાંગરેલો અને પાને-પાને નવા ઉઘાડ સર્જતો ગઝલકાર ગૌરાંગ ઠાકર"

‘વહાલ વાવી જોઈએ’નું સુંદર રસદર્શન કરાવવા બદલ કવિશ્રી જીગર જોષીનો હૃદયથી આભાર.

વાહ..જિગર..વાહ..!
ખૂબ સુંદર આસ્વાદ બદલ આભાર દોસ્ત.

Aptly appreciated, Jigarbhai. You have done a nice job.

સરસ આસ્વાદ ! ધન્યવાદ જિગરભાઈ
ગૌરાંગભાઈ ની ગઝલની ઠાવકાઈ થી આમ પણ કોણ અજાણ છે ? ગૌરાંગભાઈ ને અભિનંદન અને શુભેચ્છાઓ !

Congratulations Jigarbhai for doing such an excellent Job !!!
You have rightly said ” Shabde shabde pangrelo ne paane-paane navaa ughad sarjto Gazalkaar- Gaurang Thaker “.

Thank you so much for an Xtra-Ordinary Aaswaad of ‘VHAL VAAWI JOIE”!!!

saras. haju vadhu sher lai shakat

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s

%d bloggers like this: